الكيلو بـ60 جنيه وماتتاكلش.. يا «جملى».. انخفض الإقبال عليها بسبب ارتفاع أسعارها

2016-10-18 00:00:00

يقف بين مجموعة كبيرة من الجمال تنتظر دورها فى الذبح بمنطقة كرداسة، التى تشتهر باللحم والكبدة الجملى، منذ كان أشرف خلف صغيراً وهو يعمل جزاراً مع والده وجده، تعلم منهما المهنة حتى أصبح جزاراً محترفاً يجيد ذبح وتشفية الجمال، وبسبب كثرة العمل وشدة الإقبال على اللحوم الجملى علّم المهنة لأولاده ليساعدوه كما ساعد والده.

لم تسر الأمور على ما يرام فاللحوم الجملى التى كان الإقبال عليها كبيراً بسبب انخفاض أسعارها مقارنة بالبتلو والكندوز، انخفض الإقبال عليها بسبب ارتفاع أسعارها: «مفيش حاجة رخيصة دلوقتى، كيلو اللحمة الجملى كان بـ33 جنيه، دلوقتى بقى بـ50 و60، والكبدة بـ80 جنيه، عمر اللحمة الجملى ما طلعت الطلعة دى من ساعة ما خلقنا ربنا». يشكو «أشرف» من قلة العمل، ومن عزوف الناس عن الشراء بسبب الأسعار: «طب إحنا ذنبنا إيه، غصب عنى وعن اللى بيربى الأسعار غالية، أكل الجمل غلى زى ما كل حاجة غليت، وكله بيصب عند المواطن». يضحك «أشرف» وهو يتذكر سعر أول كيلو لحم جملى باعه: «كان بـ3 جنيه ونص بس، وقتها كانت الدنيا حلوة وكل حاجة رخيصة، دلوقتى العيشة غالية ومافيهاش بركة».