" ورجعنا تاني نقول هو بجد "
2019-05-07 11:12:00
اية التناقض دا. آية اللخبطة دي. فين الخطة ؟ فين الرؤية؟ فين التصريحات المدوية لتشجيع
الاستثماروالأنتاج لزيادة فرص العمل للشباب والكبار لتحقيق الأمن الغذائي. لإيقاف نزيف الاستيراد. لتشجيع وزيادة الإنتاج المحلي ؟؟ بصراحة أشوف تصريحاتك أصدقك وأشوف قرارتك أتعجب !! الريس نفسه صرح ودعم في اجتماعات كتيره الإنتاج المحلي بشكل عام والدواجن كثيفة العمالة بشكل خاص . طب وبعدين ؟؟؟ خلال أقل من سنة ونص مضاعفة فاتورة الكهربة ومعاملة المزارع زي القري السياحية وأية كمان مضاعفة فاتورة الميه على المزارع زي الفنادق والملاهي طب وأية تاني ؟ فرض ضريبة عقارية على المزارع كأنها قصور وفيلات. بجد أه ؟!
طب في حاجة تاني أه أحتساب ضريبة 14% على أضافات الاعلاف . والطامة الكبرى نرجع تانى نعفي المنتج الأجنبي والدواجن المستوردة من نسبة الحماية الجمركية. اللي الدولة نفسها وضعتها عشان تحمي المنتج المصري. اللى هي بتقول انها بتدعمه وبتشجعه . طب منين ؟؟
وهي بتزود علية الكهربة والمية والضريبة العقارية والقيمة المضافة وكمان تتركه فريسة لمافيا المستورد
اللي في الاخر ح يجيب الفراخ تاني وصلاحيتها تنتهي ويبيعوا التلاتة ب 50 جنية .
هو في أية بالظبط ؟؟!
أية التضارب دا .أية الازدواجية دي . الريس نفسه يأمر رئيس الحكومة بدعم المنتج المحلي وعدم السماح بأغراق المستورد له والحفاظ على العملة الصعبة والعمالة الوطنية .
ويأمر رئيس الوزارء بذلك .وفعلا يشكل رئيس الوزراء لجنة المهمة الأولي لها تطوير الصناعة والحفاظ على الإنتاج المحلي. وعدم دخول المستورد ألا في الحاجة الشديدة .
ويطمن المربيين اللي زودوا من أنتاجهم لشعورهم أن القيادة السياسية والحكومة تقف بجد مع الإنتاج وتشجعه وتدعمه. ولكن للأسف تحكمنا سياسة الجزر المنعزلة . التموين يعشق الاستيراد
والمستوردين يهمهم منافعهم ومصلحتهم ولجان السفر والسياحة المدفوعة بالكامل من مال الدولة. لأ وأية أصبحت لجنة تنظيم وتشجيع صناعة الدواجن ( بقدرة قادر ) همها الأول عرض طلبات الاستيراد والسعي والضغط لتنفيذها ؟؟؟
بالله عليكم عايز أفهم هو بجد انتم عايزين استثمار وأنتاج. وبجد عايزين تزيدوا من فرص العمل وبجد عايزين يبقي عندنا أمن غذائي وناكل من أيدينا ؟ وبجد عايزين نروح للظهير الصحراوي ونعمر الصحراء بمزارع الدواجن ونخلق مجتمعات جديدة هناك؟؟؟؟ وبجد عايزين نصدر كما كنا ونجيب عملة صعبة بدل ما نفقدها في الاستيراد ؟؟؟
ياريت نتفق على خطة ورؤية ، لكن كل يوم قرار و كل ساعة تصريح . وكل دا حسب ما كل مسؤل شايف . أتفقوا يا سادة عايزين ولامش عايزين . وبجد ولا.....؟؟
لازم يكون في وضوح في الرؤية وجدية في تنفيذ الخطة والعمل كفريق واحد ونبطل التخبط وعدم المسئولية .
مصر في مرحلة عايزا الوضوح والعمل الدءوب.
نرجع تاني ونقول الاستيراد هو حل العاجز السهل. وعمره ما ح يبني أوطان؟
وبلدنا مش ح يبنيها غيرالإنتاج والانتاج وبس والمصيبة أننا كلنا بنقول دا ونسمعه لبعض ليل ونهار
وبعدين نعمل حاجة تانية . كلنا بنحب البلد خلينا متفقين على كلمة سواء
ونحبها بالعمل والإنتاج ودعم اقتصادنا مش أقتصاد الاخريين وحماية عمالنا ومزارعنا .
مش عمال ومزارع التنين.
ياريت نستيقظ ونتفق ونعمل . ولن نتحرك للأمام ألا بالعمل والإنتاج . ويارب يكون هناك من يقف هذا الهراء ويلزم الجميع بتفعيل اقوالهم الى أفعال تخدم العمل والإنتاج والاقتصاد.
تصبحوا على وطن ،،
د. ثروت الزيني
نائب رئيس الاتحاد العام لمنتجي الدواجن
الموضوعات المشابهه
زراعة بورسعيد: وصول المساحات المنزرعة بالأعلاف إلى
"زراعة الشيوخ" توصى بتوفير مليون طن أعلاف
خطة "الزراعة" للنهوض بتربية النحل لزيادة الصادرات
كيفية تصنيع عليقة للدواجن
د مصطفى بسطامى العميد الأسبق لبيطري القاهرة
أسعار الدواجن فى مصر تواصل تراجعها والكيلو
انخفاض مفاجئ 4 جنيهات فى أسعار
أستاذ زراعة لـ"إكسترا نيوز": إنتاج 12 مليون
أسباب تراجع استيراد اللحوم والماشية الحية وثبات
الحكومة تقرر إعفاء مزارع الدواجن من الضريبة
الزراعة: صرف 1,6 مليار جنيه قروضا بمشروع
د حامد البنا خلال شهادتة على العصر
تعليقات
اضف تعليق